Dôs laureadis de Universitât dal Friûl, Chiara Malisano di Udin e Alice Nesich di Triest, a son lis vincidoris de tierce edizion dal premi di lauree Animaimpresa Young, inmaneât de associazion Animaimpresa, che di plui di 13 agns e promôf la sostignibilitât sul teritori. Il concors al è destinât aes tesis di lauree trienâls e magjistrâls che a proponin azions concretis par acelerâ il disvilup sostignibil dal Friûl-Vignesie Julie. Il premi al è di 500 e 1.000 euros in maniere rispetive.
Ae iniziative a partecipin lis Universitâts dal Friûl e di Triest e la Academie di Bielis Arts di Udin. Il premi al è stât sostignût des aziendis Idealservice e Atis e al pues ancje contâ sul patrocini di ASviS – Alleanza italiana per lo sviluppo sostenibile, e la colaborazion de Agjenzie Lavôr & Sviluppoimpresa de Regjon Friûl-Vignesie Julie.
Malisano, laureade in Siencis pal ambient e la nature dal Dipartiment di Siencis agroalimentârs, ambientâls e animâi, e à vinçût il premi pe miôr tesi di lauree trienâl. Il so lavôr al è dedicât ae “Analisi di sostignibilitât dal setôr de distribuzion automatiche taliane”.
Il premi di lauree magjistrâl al è stât vinçût di Nesich, laureade in International marketing, direzion and organization dal Dipartiment di Siencis e economichis e sociâls. La sô tesi e fevele des “Circular opportunities for fast-moving consumer goods (fmcg) packaging. The case of illycaffè”, ven a stâi lis oportunitâts di tornâ a doprâ i imbalaçs dai prodots che ducj e comprin, il câs de Illycaffè.
La cerimonie di consegne dai premis e je stade fate a Pasian di Prât, inte sede de Idealservice. l’Ateneu al jere rapresentât da docents Francesco Marangoni e Stefania Troiano che a àn sotlineât “la impuartance di iniziativis di chest gjenar par acompagnâ lis gnovis gjenerazions inte realizazion des tantis ideis che a àn viers de transizion ecologjiche”. (a.d.g.) – 17.10.23
