I numars di record regjistrâts l’an passât a son aromai impussibii di tocjâ. Il brut timp al è daûr a frenâ il turisim in Friûl, ruvinant ancje i bogns risultâts otignûts a Jugn e intes primis trê setemanis dal mês passât. Par fortune, la basse stagjon e je daûr a salvâ il turisim estîf.
Dai 24 di Lui, la ploie e i temporâi a àn scomençât a avilî la rivade dai turiscj a Lignan, massime chei pendolârs o cui che al sielç di movisi al ultin moment.
“Prime dai 24 di Lui o jerin in paritât sostanziâl a pet dai numars dal an passât, dopo il timp al à scomençât a remâ cuintri”, al sclarìs Emanuele Rodeano, president di Li.Sa.Gest. -. I numars dal 2022 no si podaran ripeti. Dopo la flamade di Jugn e dal di principi Lui, e je lade simpri piês. Lis previsions e la pôre dal brut timp a àn puartât di fat tancj turiscj a dineâ i ombrenons o a movi lis prenotazions”.
Se Lignan e vai, Grau no rît. Di principi stagjon, inte Isule dal soreli a son stâts contâts dome trê fin di setemane di dut esaurît. Un dât che al va però acompagnât ancje ae capacitât plui basse di spese dai turiscj presints, forsit dovût ancje al aument dal 4% dai presits medis su furniments di lît e gjenars alimentârs. (a.d.g.) – 08.08.23
