Une ‘comunitât temporanie’ ai Stai di Mueç

Cuatri dîs di spetacui, esperiencis e laboratoris tal cûr de mont furlane: e je le tierce edizion de rassegne “Isola di Stavoli”; tal borc dai Stai (in comun di Mueç), che si davuelç dai 3 ai 6 di Lui. Nassût par scomesse intun borc lontan e inmagant, al è deventât subite un apontament culturâl unic, bon di tirâ dongje un public simpri plui larc cuntune ufierte che e va des arts ae musiche, fint al benstâ pal cjâf e pal cuarp. La rassegne e je fate dute tal viert, là che si rive dome a pîts, nol è colegament internet, ni un incuinament di lûs e suns, si che duncje l’isolament al favorìs la presince, la scolte e il contat di ognidun cun se e cul paisaç. La direzion artistiche di Luisa Schiratti e Michele Pucci e à sielt la memorie tant che teme centrâl di cheste edizion, che e sarà analizade tal sens coletîf e chel di ricercje individuâl in spetacui par un spetatôr ae volte, laboratoris, moments di confront. Tancj i ospits: la cjantante Elsa Martin, in version acustiche sul Glagnò, il cjantautôr Massimo Silverio, i Cinque Uomini sulla Cassa del Morto,la zovine danzadore Carolina Valentini, il spetacul di Marcela Serli e Andrea Collavino,la narazion di Sara Beinat. E po dopo, nons za passât par chi, di Paolo Forte a Astronauti Ovunque, di Manuel Buttus a Marta Riservato e Flavio D’Andrea: ducj dentri di une ‘comunitât temporanie’ che e vûl imagjinâ alc di gnûf pal borc. (A.I.) – 02.07.2025