Un grant progjet pe cjartere di Davâr

In mont no si vîf dome che di agriculture e turisim, ma ancje di industrie: in cuasi dusinte impresis de Cjargne a lavorin plui o mancul 5 mil personis. Un riferiment sociâl e economic al è stât di passe cent agns la cjartere di Davâr, inviade dal 1923 tal Cjanâl di Guart. Passade dal 1985 al grup industriâl RDM Group (Reno De Medici), il prin in Italie e un dai prins in Europe pe produzion di cartoncin da materiâl riciclât, e dâ lavôr a 170 personis e ancjetantis tal indot. La fabriche storiche e je stade sielte tant che model e esempli di un progjet culturâl bon di valorizâle e mudâle intun lûc di ecelence pe sostignibilitât e la resilience de mont furlane. Il progjet “La cjartere di Davâr, patrimoni industriâl de Cjargne” al è stât presentât dal diretôr dal stabiliment, Rosario De Marchi, e di Giuseppe Gori cun ducj chei che si son zontâts al progjet. A poiâlu e sostignîlu, lis associazions Isoipse e Lago, il Comun di Davâr, Carnia Musei, la cooperative Cramars e la stesse Cjartere. In program, une schirie di iniziativis, tacant di une ricercje storiche e etnografiche, ma e je za in vore une racuelte di tocs, fotografiis e testemoneancis cjapâts sù tal stes lûc e cualchi colaborazion cun artiscj che a doprin la cjarte. (A.I.) – 01.03.2026