Pasolini e Turoldo, dôs ‘animis furlanis’ intun documentari

Doi oms unîts des origjins furlanis, de passion pe poesie e pe musiche, dal impegn a pro dai ultins. Vuê ancje di un documentari, “Stare al mondo: Turoldo e Pasolini”, che al vignarà presentât aes 5 dopomisdì di sabide ai 26 di Novembar, pe prime volte in Friûl Vignesie Julie, inte glesie parochiâl di Coder di Sedean. Inmaneât e promovût dal Ent Friuli nel Mondo intal 30m aniversari de muart di David Maria Turoldo e intal 100° de nassite di Pier Paolo Pasolini, il documentari al va ae ricercje dai leams e des afinitâts inte vite e inte opare di Turoldo e Pasolini, tacant dai lûcs, Coder, Cjasarse, il Tiliment, sielts tant che senari dal regjist Omar Pesenti. (A.I.) – 25.11.2022