Lis sculturis di Mascherini te vile di Butinins (e tal parc)

Un dai scultôrs plui grancj dal secont Nûfcent talian e european, nassût a Udin ma cressût a Triest, Marcello Mascherini (1906-1983) al è al centri de gnove mostre screade te vile de Claricini Dornpacher, a Butinins di Muimans, là che e sarà vierte fint ai 2 di Jugn, “Marcello Mascherini. Gioia di vivere” (Gjonde di vivi) e je une antologjiche in ocasion dai 120 agns de nassite dal artist: un percors imersîf che al instrece sculture, paisaç e architeture. Inmaneade par cure di William Cortes Casarrubios, in colaborazion cul Archivi dal artist e cu la poie de Regjon F-Vj, daspò dal ricognossiment de Fondazion de Claricini Dornpacher tant che “contignidôr culturâl creatîf”, e je la prime di une schirie di mostris di sculturis tal viert. Un percors ideât propit pe vile e promovût di Alessandro Del Puppo de Universitât dal Friûl. Tal parc storic e il zardin di limons de vile, la mostre e presente une selezion di cutuardis sculturis in bronç, puartant lis oparis te lôr dimension “naturâl”: chê dal spazi viert. “ Dentri de vile, invezit, il percors al è dedicât al cicli des rosis, la ultime fase de ricercje artistiche dal artist. (A.I.) – 25.03.2026