Lis liniis di confin spiegadis dal antropolic

Al è un invît a cambiâ prospetive e meti in dubi il significât dai confins che al è stât butât fûr di “Tra le pieghe dei confini”, Jenfri lis pleis dai confins, l’incuintri in program miercus ai 13 a lis 6 di dopomisdì tal Centri civic di Çarvignan. L’event al fâs part dal progjet “Migrant: srotolare il confine” (disrodolâ il confin) e al è organizât de associazion Menti Libere. Protagonist al sarà l’antropolic Marco Aime, che al puartarà il public a une riflession fonde e puntuâl sul significât dai confins, in conversazion cu la gjornaliste Anna Piuzzi. A traviers di une cjalade antropologjiche, l’event al puartarà a domandâsi cemût che lis liniis che a dividin il mont no son elements naturâi, ma costruzions umanis, che a son dut câs buinis di formâ identitâts, pinsîrs e relazions. (A.I.) – 12.05.2026