In ocasion de Zornade mondiâl de Libertât di stampe dai 3 di Mai, la associazion Leali delle Notizie e inmanee joibe ai 2 a Roncjis di Monfalcon un incuintri cu lis scuelis secondariis di prin e di secont grât, viert ancje a dute la citadinance. L’incuintri al è dedicât ae memorie di gjornaliscj e operadôrs de informazion che a àn pierdût la vite intant che a fasevin il propri mistîr. Chest an lis testemoneancis a vignaran puartadis des fameis di Andrea “Andy” Rocchelli, di Mario Paciolla, di Italo Toni e di Graziella De Palo, ducj gjornaliscj copâts: par lôr si va indevant ancjemò a domandâ veretât e justizie. Dilunc de manifestazion e je previodude ancje une “Cjaminade de libertât di stampe e di espression”, che e viodarà protagoniscj i students e la popolazion, cun 24 panei dilunc des viis dal centri di Roncjis di Monfalcon intun percors tra lis storiis di gjornaliscj e operadôrs de informazion che a àn pierdût la vite intant che a fasevin il lôr lavôr. (A.I.) – 30.04.2024
Foto di L. d’Agostino
