Giulia Orecchia, cuviertinis par autôrs iconics

Cu lis sôs ilustrazions e à animât i tescj di autôrs iconics dal nestri timp, di Andrea Camilleri a David Grossman, di Italo Calvino a Gianni Rodari. Giulia Orecchia e à ilustrât passe 200 titui, lavorant dispès in cubie cun autôrs tant che Bruno Tognolini, Roberto Piumini, Vivian Lamarque… Une des plui cognossudis e amadis ilustradoris talianis pe infanzie, plui voltis premi Andersen, inte sô cariere la dissegnadore e à publicât cui plui grancj editôrs nazionâi talians, ilustrant tescj, dissegnant cuviertinis e progjetant libris cun sorpresis visivis pai plui piçui. Dai 14 di Setembar e fint ai 17 di Novembar, inte galarie Sagittaria di Pordenon, al rive un omaç apassionât ae sô creativitât straordenarie: la mostre “Giulia Orecchia. Aria Giochi Luce” (Aiar Zûcs Lûs), promovude dal Centri Iniziativis Culturâls di Pordenon par cure di Silvia Pignat e Angelo Bertani. La scree, cuntun centenâr di oparis in esposizion, e sarà ae presince de artiste. (A.I.) – 12.09.2024