A son in rêt su www.bottegaerrante.it lis mapis interativis, la linie dal timp e i podcast fats di Bottega Errante inte suaze di “Place Nûfcent”, un progjet firmât de stesse associazion culturâl e fat cu la poie de Regjon e de Fondazion Friuli. Daspò di dîs cjaminadis in dîs citâts dal Friûl-Vignesie Julie (Monfalcon, Vençon, Gurize, Triest, Aquilee, Udin, Pordenon, Tor di Zuin, Cividât, Tumieç), in graciis de consulence storiche di Enrico Folisi e i scats dal fotograf Paolo Brisighelli, e je stade concludude ancje la mape interative: une par ogni place. L’utent, jentrant sul sît inte pagjine dedicade, al cjatarà dîs mapis par dîs placis, dulà che al sarà pussibil consultâ fotos di archivi, videos, imagjins e tescj che a sintetizin cierts avigniments sucedûts li intal secul passât. Inte stesse sezion dal sît al sarà disponibil ancje il podcast “Piazza 900”: cuatri pontadis fatis in colaborazion cun Radio Onde Furlane, scritis, curadis e contadis di Monica Mosolo. (A.I.) – 10.02.2025
Foto di P. Brisighelli
