A Udin un program pe radio de Svuizare taliane

da Andrea Ioime

La gnove musiche furlane e jentre di volop tal gnûf spazi culturâl de citat di Udin, la “Cavallerizza”, screade te Vierte passade e rivade ae prime stagjon uficiâl. Un percors di incressite tal gnûf spazi culturâl creatîf nassût tai ambients ricualificâts de ex caserme “Osoppo”, che al è promovût no dome de orchestre Filarmonici Friulani, di SimulArte e de Coral dal F-Vj, ma ancje di altris ents, di chenti e dal forest. Di lunis ai 16 e fint a miercus ai 18 e sarà ospitade la produzion di une gnove serie di pontadis d un program di musiche de radio television svuizare di lenghe taliane, “Babilonia”, in onde su RSI Rete Due. Trê zornadis di regjistrazions par dodis incuintris a ancjetancj musiciscj, oms e feminis dal Friûl-Vignesie Julie, che a contaran il lôr univiers artistic e musicâl ai condutôrs Sergio Albertoni e Valerio Corzani. Invidant a esplorâ la musiche cence confins di gjenar, timp e lûc, cuntun viaç di suns fat di peraulis e cjançons, Babilonia al à sielt a Udin dodis artiscj diferents par etat, gjenar.., cuntune selezion che e travierse lengaçs, gjenerazions e sensibilitâts, dal jazz ae cjançon di autôr: Francesco Bearzatti, Massimo Silverio, Nicole Coceancig, Marco Battigelli, Physalia, Daniele D’Agaro, Davide Toffolo, Elsa Martin, Glauco Venier, Francesco Tirelli, Toni Bruna e Giovanni Maier. Ancje lis regjistrazions e la regje des pontadis – che a laran in onde vie pal an che al ven – a son fatis cuntun dai “miôr” di cjase nestre: Stefano Amerio, tecnic dal sun e produtôr. (A.I.) – 16.11.2026

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Progjet finanziât de ARLeF
Agjenzie Regjonâl pe Lenghe Furlane

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui