A Çopule in Avost lis “Setemanis de art”

La farie creative de associazion culturâl Molino Rosenkranz no si ferme pal Istât. A pene sierade cun sucès la rassegne teatrâl par fruts e frutis “Fila a Teatro sotto gli alberi”, in Avost al rivarà il moment pai plui piçui di sperimentâ, zuiâ e dâ spazi ae fantasie cu lis “Setemanis de art”. La esperience dedicade ai fruts dai 5 ai 10 agns, par mudâ ogni matine intune aventure creative, e je stade inmaneade cul Comun di Çopule e la associazion di volontariât La Sorgente e si davuelzarà dai 24 ai 28 di Avost e po dopo dai 31 di Avost fint ai 4 di Setembar, cuntune schirie di ativitâts e laboratoris. Ogni zornade e je un viaç dentri di diferents lengaçs de art: teatri, musiche, danze, circ, cun lezions in grup par disvilupâ e stiçâ la fantasie e la creativitât, favorint la colaborazion e la cressite intun grup. Lis ativitâts si fasaran tal centri “Pasquini” di Çopule e stant che i puescj no son masse, bisugne notâsi dentri dai 31 di Lui lant in rêt su: www.molinorosenkranz.it. (A.I.) – 29.07.2026