Il Cuestôr di Udin, Domenico Farinacci, al à mandât fûr une schirie di Daspo (Divieto di accedere alle manifestazioni sportive) de durade di 5 agns ognidun cuintri dai vot ultrà arestâts sabide di sere a Basilian, cuant che a àn assaltât il tren indulà che a jerin i tifôs dal Vignesie, ae fin de partide Udinese-Venezia zuiade tal stadi Friûl e vinçude 3 a 2 dai furlans.
A jessi arestâts a son stâts 6 tifôs dal Salisburgo – cinc citadins austriacs e un bosgnac – e dôs personis che a vivin a Udin, citadins talians, tal ordin di origjin albanese e senegalese, cul ultin che nol sarès nancje tifôs dal Udin.
Al è talian l’om denunziât a pît libar sabide di sere de Polizie. Ae une dopomisdì, i vot arestâts a son lâts denant dal judiç dal tribunâl di Udin Matteo Carlisi.
I agjents de Cuesture di Udin a stan investigant su altre int che e à vût part al assalt. (a.d.g.) – 03.02.2025