Al à crevât la puarte dal ristorant-pizarie Biffi, in centri a Udin, e al à puartât vie il regjistradôr di casse. Par chest, vuê il judiç dal Tribunâl di Udin Camilla Del Torre e à condanât cul rituâl scurtât Mohammed El Adraoui, citadin marochin di 27 agns, ospit inte ex Caserme Cavarzerani, a un an e 10 mês di reclusion. La pene e je stade sospindude, a cundizion che l’om al pai ae proprietât, rapresentade dal avocat Francesca Tutino, 800 euros come provisionâi pai dams patîts.
La spacade e rimonte ae gnot dai 8 di Novembar dal 2022. Pôc prime des 4, l’om insiemit e un zovin di 17 agns, ancje lui forest, a vevin slidrisât la puarte jentrant intal locâl cu lis musis platadis di capuçs. Duncje a àn taiât i fîi di alimentazion dal regjistradôr di casse e a àn tentât la fuide. Dut al è stât filmât des telecjamaris instaladis inte pizarie. Il sisteme di alarme al à visât il titulâr Diego Giordano, che al à alarmât la polizie. Dopo un inseguiment tra lis viis citadinis, i doi a son stâts cjapâts e arestâts. (A.D.G.) – 12.04.2023
