Doman aes 8 e trê cuarts sot sere si zuiarà la partide di balon tra Italie e Israêl, ma il stadi za di vuê al è dal dut blindât in spiete di un incuintri che al è considerât a risi alt dal Osservatori talian su lis manifestazions sportivis.
A son stadis metudis jù barieris e tres tant che no si rive a svicinâsi al stadi e inte zone al è dut un va e ven di fuarcis dal ordin.
Doman il Plan di sigurece previodût de Prefeture al sarà doprât dal dut tal rest de citât. Cundut dal acuardi di pâs za firmât, il moviment Pro Palestine al à confermât la manifestazion previodude tal dopomisdì, cul corteu che di place Repubblica aes cinc e mieze si movarà bande place Primo Maggio, che i organizadôrs a spietin almancul 10 mil partecipants, ancje se la rivade de pâs al podarès fâ calâ i presints.
In citât lis regulis dal Plan di sigurece a jentraran in vore des 8 a buinore e a saran di rispietâ fintremai de miezegnot. (a.d.g.) – 13.10.2025
