Spaçadôrs arestâts a Udin des bandis di vie Giulia e vie Buttrio

da Alessandro Di Giusto

Arestâts dai agjents de Cuesture di Udin doi spaçadôrs di droghe. Si trate di un pakistan di 29 agns, iregolâr e in spiete di tornâ in patrie, e di un marochin di 26 agns. La investigazion dai poliziots e je stade fate dopo che cierts residents de zone a soreli jevât de stazion feroviarie si jerin lamentâts pal degrât e pal spaç di droghe, soredut intes areis dongje di vie Giulia e di vie Buttrio.

I agjents de scuadre mobile a àn viodût in vie Ipplis il pakistan intant che al vendeve un sacut a un om e al cjapave bêçs. I doi a son stâts daurman fermâts e controlâts e cussì a àn scuviert che il pakistan al veve intes sachetis 350 euros e un altri sacut cun dentri 89 grams di hashish. Pal pakistan il judiç des indagazions preliminârs al à convalidât l’arest e decidût la misure cautelâr de improibizion di vivi a Udin.

Ancjemò i agjents de scuadre mobile a àn viodût un marochin di 26 agns che al rivave bande vie Buttrio dilunc dai binaris de ferovie: une volte fermât e controlât i àn cjatât intor un toc di hashish di 78 grams e par chest l’om al è stât arestât e puartât dret in preson. (a.d.g.) – 05.02.2025

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Progjet finanziât de ARLeF
Agjenzie Regjonâl pe Lenghe Furlane

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui