Une femine di plui o mancul 80 agns che e stave lant cu la sô biciclete e je stade tirade sot vuê di matine, pôc dopo des 11 a Udin, dilunc vie Pradamano. La siore e je stade pocade di une Lancia Ypsilon, vuidade di un vieli che al rivave di vie di Brazzà, e e je colade a tiere. A judâ daurman la vitime che e je a stâ a Baldassarie e je stade int che e passave di chês bandis in chel moment, che tra chei a jerin une dotoresse e une infermiere, in spiete de ambulance.
Par protezi la feride che e pierdeve sanc e e jere restade distirade par tiere un vuidadôr al à metût di traviers su la strade il so furgon. La femine e je stade puartade cu la ambulance tal ospedâl di Udin. Sul puest ancje i agjents de Polizie locâl par fa i rilêfs. (a.d.g.) – 24.02.2026
