I financîrs dal Comant provinciâl di Pordenon a àn arestât, in flagrance di reât, un citadin afghan che, cun intor une microtelecjamare e un auricolâr tant piçul, al veve a pene passât la prove teoriche pe patente di vuide in graciis di un ‘ sugjeridôr’, esterni ae aule di esam, che i furnive dutis lis rispuestis esatis. Il dì dal esam, dacuardi cui vertiçs de Motorizazion Civîl, i Financîrs a àn controlât i varis candidâts, individuant un che al rispuindeve aes domandes dome dopo vê fat moviments piçui, tra chei chel di justâsi dispès il cuel de maie.
Ae fin de prove, passade dal candidât cul massim dai vôts, l’om, un 33enne afghan, al è stât fermât e controlât dai agjents che a àn cjatât e secuestrât un aparât trasmitent cuntune microtelecjamare, platade intal boton plui grant de maie. Il forest – dopo vê estrat a fadie il micro-auricolâr indulà che al scoltave lis rispuestis coretis – al è stât arestât par vê provât di indusi in erôr il public uficiâl de Motorizazion inte formazion di un at public che, se dut al fos lât tant che previodût, al sarès risultât fals. (A.D.G.) – 23.01.2023
