Un om di plui o mancul 65 agns di etât al è stât socorût chest dopomisdì dopo jessi colât in svaniment intal teritori comunâl di Pontebe, dilunc de ex provinciâl 112.
La sô presince su la strade e je stade segnalade di cualchi passant al Numar unic di emergjence Nue112. Sul puest a son rivâts une ambulance di Scluse e l’elisocors. Probabilmentri, par vie di un mâl (si pense a un arest cardiocircolatori), la persone e sarès colade di un nivel a chel altri de viabilitât, di une altece di plui o mancul 2 metris, e colant si è fat mâl ancje al cjâf. Dopo jessi stât rianimât e intubât, il ferît, in cundizions gravis, al è stât traspuartât cul elicotar al ospedâl Sante Marie de Misericordie di Udin. Sul fat a indaghin i carabinîrs di Tarvis (A.D.G.) – 21.03.2023
