Masse visitadôrs intal apartament, arestât un spaçadôr a Pordenon

Il strani va e ven di int intun apartament di Pordenon, dongje de sede de Vuardie di Finance, nol è passât inosservât. E’ cussì e je tacade la percuisizion intun apartament, dulà che lis Flamis Zalis a àn cjatât doi chilos di hashish, passe 123 grams di cocaine e bêçs par un totâl di 39.051 euros.
Arestât un citadin afghan, cun precedents par droghe, che al veve preparât in cjase une vere e proprie centrâl di spaç.
Dopo un periodi di osservazion, i militârs a àn fermât un ‘client’ a pene jessût dal imobil cuntune dose di hashish. Daspò il control al à permetût ai financîrs di cjatâ e secuestrâ – platâts jenfri confezions di mangjative, efiets personâi, bagais e induments – 24 pachets e 70 dosis confezionadis di hashish. In plui a son stâts cjatadis ancje 130 dosis e 2 sacuts di cocaine e un grant pac di bêçs contants. (ADG) – 3.10.2022