Incident mortâl par un motociclist, îr di sere tor des siet e mieze a Cjarpenêt, dilunc de strade che e puarte a Puçui. Vincenzo Varriale, avîr di 27 agns de Aeronautiche militâr, mecanic des Frecis Tricolôrs, al à pierdût il control de sô motociclete forsit par vie de ploie fuarte, sfracassantsi cuintri un morâr. L’om al è muart sul colp par vie des lesions gravis ripuartadis. Fatâl l’impat cul arbul: dibant lis provis par rianimâ il zovin, nassût in provincie di Caserta, ma resident a Pasian di Prât. I sanitaris dal 118, rivâts daurman dopo dal incident in vie Petri, no àn podût fâ altri che constatâ il decès dal zovin.
I carabinîrs de stazion di Tisane, intervignûts sul puest pai rilêfs, pal moment a àn escludût il coinvolziment di altris mieçs. Al è tant probabil che la jessude di strade e sedi stade causade dal fuart temporâl tacât propit in chei minûts. (A.D.G.) – 15.06.2023
