Al è stât regjistrât tal regjistri dai indagâts pe ipotesi di omicidi stradâl l’om di 32 agns che te matine sul tart di sabide ai 1 di Avost, al à cjapât sot cu la sô auto Cristian Pascoletti, 41 agns, di Bordan, dilunc de strade statâl Pontebane, tal teritori di Mueç, dongje dal confin cun Vençon.
Si trate di un at obleât par permeti al om indagât, che al vîf a Mueç, di cjapâ part a ducj i aciertaments tecnics che no si puedin ripeti, tacant de autopsie e dai esams tossicologjiis sul cuarp de vitime.
Il fat al è sucedût cuant che la vitime si ere fermade in bande par controlâ ce che al veve il motôr dal so mieç. Su la fonde des primis ricostruzions, la Skoda Octavia vuidade dal om di Mueç, che e rivave di che altre bande, lu à cjapât implen tal moment che al stave fasint un sorpàs. Il colp al jere stât cussì fuart che il cuarp di Pascoletti al jere stât sbalçât di desenis di metris.
I tentatîfs di rianimazion dal om che al lasse une fie di 16 agns, fats dai sanitaris rivâts sul puest cun ambulance e elisocors, a son stâts dibant. Sul incident a indaghin i carabinîrs. (a.d.g.) – 03.08.2026
