A son passâts vot agns dai 25 di Zenâr dal 2016, il dì che Giulio Regeni al è sparît al Cairo, in Egjit. Il cuarp cence vite dal ricercjadôr furlan al è stât cjatât fûr su la cee de autostrade “Il Cairo – Alessandria” ai 3 di Fevrâr dal 2016, marturizât di segns di torture, tant che la mari Paola e veve declarât, intune conference stampe, di vê viodût su la sô muse «dut il mâl dal mont». Al è di chel moment che la famee Regeni, simpri sostignude de legâl Alessandra Ballerini, e cîr e e pretint veretât e justizie. Infin, dopo la sentence de Cort Costituzionâl che e à dât la vie libare al procès, i cuatri 007 egjizians imputâts intal procediment penâl pal secuestri, la torture e la muart di Giulio a son stâts rimandâts a judizi. La prime udience a Rome e je fissade pai 20 di Fevrâr. Joibe ai 25, intal otâf aniversari de sparizion di Giulio, e je previodude une schirie di iniziativis, organizadis de Aministrazion Comunâl di Flumisel Vile Visintine, in colaborazion cul coletîf “Giulio siamo noi”: un intervent dal Guvier dai Zovins, la “Cjaminade dai dirits” e il spetacul “Peraulis, imagjins, musiche par Giulio”, cun ospits tancj amîs, politics, gjornaliscj, atôrs e il conciert dal NuVoices Project. (A.I.) – 24.01.2024
57
