A son stâts ducj condanâts, infûr che il zovin di origjin senegalese, i tifôs che sabide sore sere a son lâts al assalt dal tren che al puartave a cjase i tifôs venezians.
Lis ipotesis di reât a jerin bloc feroviari, barufe ingriviade, resistence a uficiâl public, utilizazion di fumogjens e di bastons dilunc des manifestazions sportivis.
Ducj i 5 tifôs dal Salisburgo a àn patizât un an e 8 mês di reclusion. Il zovin bosgnac, ancje lui tifôs de scuadre austriache, al à patizât doi agns.
Dai doi che invezit a son a stâ a Udin, chel di origjin albanese al à patizât un an e 10 mês, intant che pal zovin di origjin senegalese, metût ai arescj domiciliârs, al varà di doprâ il braçalet eletronic parcè che il so avocat al à domandât plui timp; il zovin, che al sta fasint il cuint an des superiôrs, al podarà dut câs lâ a scuele.
Ducj i tifôs condanâts a àn gjoldût de sospension condizionâl de pene e a son za libars. (a.d.g.) – 03.02.2025