Dopo pôcs dîs dai 3 di Avrîl, date de ricorence uficiâl de Fieste de Patrie dal Friûl, al ven anunziât il program des celebrazions uficiâls de edizion numar 46 de Fieste de Patrie dal Friûl. Domenie ai 16 di Avrîl e sarà Caprive che e darà acet ae manifestazion, dopo vê ricevût il “testemoni” di Vît, dulà che la Fieste si è davuelte tal 2022.
Chest an la bandiere e sarà la protagoniste impuartante des celebrazions: l’Istitût Ladin Furlan “Pre Checo Placerean” e la ARLeF – Agjenzie regjonâl pe lenghe furlane a àn comissionât al artist marcjesan Francesco Pellegrini la realizazion di une riproduzion fedêl dal vessil storic, che e sarà presentade pe ocasion e che, tacant di cheste edizion, e deventarà il “testemoni” che i sindics ospitants si scambiaran un an daûr chel altri.
Il program des celebrazions uficiâls pe Fieste de Patrie dal Friûl 2023 – organizade dal Comun dal Friûl orientâl cul finanziament de Regjon Autonome Friûl-Vignesie Julie e de ARLeF, in colaborazion cul Istitût Ladin Furlan “Pre Checo Placerean” – al tacarà aes 9.30 cu la esposizion de Bandiere dal Friûl, in vie Dante Alighieri. E acompagnarà il moment celebratîf la bande “Città di Cormons” che e sunarà “Incuintri al doman”, l’Imni uficiâl dal Friûl. Aes 10, te glesie parochiâl di Caprive si fasarà Messe in lenghe furlane, cun leturis e preieris ancje in lenghe slovene e todescje. La liturgjie e sarà acompagnade dai cjants dal “Polifonico Caprivese”, e il moment religjôs al sarà precedût e sierât dal grup dai “Scampanotadôrs dal gurizan”. Lis celebrazions si spostin po dopo li dal Centri civic di Caprive, dulà che e rivarà une delegazion di cicloturiscj de FIAB regjonâl, partide in maniere simboliche di Aquilee te buinore e, subit daûr, a saran lis esibizions dai grups folcloristics “Michele Grion” e “Primavera”.
La cerimonie civîl de Fieste e tacarà aes 11.30 cul Imni uficiâl dal Friûl cjantât dal “Polifonico Caprivese”; po dopo, si fasarà la leture de bole imperiâl par cure dal grup storic “Città di Palmanova”, il scambi de bandiere – che al rapresentarà, come che si à dit, la grande novitât di cheste edizion -, e a saran i salûts des autoritâts. La matinade si sierarà cu la consegne di un ricognossiment a Lucia Follador, diretore dal côr “VocinVolo – Ritmea” di Udin, protagonist dal video 2023 dal Imni uficiâl dal Friûl, publicât sul web propit tai dîs passâts e zirât te Vile Gallici Deciani.
Dopo dal gustâ te curnîs storiche di Vile Russiz, a son previodudis dôs visitis vuidadis: aes 15 te Fondazion Villa Russiz e aes 16.30 tal Cjistiel di Spesse. Pal gustâ e pes visitis vuidadis e je obligatorie la prenotazion: dentri des 13 dai 11 di Avrîl si pues scrivi al Sportel Furlan a info@sportelfurlan.eu o telefonâ al 0432 1743400.
Cui che nol podarà partecipâ di persone ae Fieste, al podarà stâi daûr in direte su Telefriuli (canâl 11 dtt), des 10 indenant. E vignarà trasmetude la Messe par furlan e, subit dopo, il speciâl de trasmission “Il campanile della domenica”.
Si segnalin infin doi events colaterâi che a anticiparan a Caprive lis celebrazions de domenie. Ai 14 di Avrîl, des 8.30, il president dal Istitût Ladin Furlan “Pre Checo Placerean” al presentarà ai fruts de scuele primarie il fumut “3 di Avrîl 1077”. La dì dopo, sabide ai 15 di Avrîl, aes 10, la sale dal Centri civic di Caprive e darà acet ae cunvigne sui stâts gjenerâi dal teatri furlan.
Lis celebrazions de Fieste dal Friûl a van indenant su dut il teritori furlan cuntun calendari siôr di events culturâi promovûts di plui di 60 Comuns che a àn aderît al bant de ARLeF, in atuazion de Leç 6 dal 2015 pe poie aes manifestazions che a acompagnin la ricorence. (A.D.G.) – 11.04.2023
