In cuasi trente agns al è cambiât il public, a son cambiats i diretôrs artistics – e cualchidun magari cussì no nus à lassâts masse adore – e ancje i ospits. No il sens e il pês di “Jazz & Wine of Peace”, il prin festival de Sierade dedicât ae musiche di improvisazion, un dai prins a sielzi artiscj no dome de ‘tradizion’ e a puartâ la musiche no dome in teatris ma ancje in cantinis e vilis storichis. Di simpri, tacant di Cormons, la rassegne inmaneade dal circul culturâl Controtempo e met in dialic cheste bande e chê slovene dal Cuei tal segn de musiche e de pâs jenfri i popui, cuntun messaç simpri fuart e atuâl e la voie – confermade dal diretôr artistic Enrico Bettinello, di jessi un “spazi di relazions, un archivi vivent di afiets”, prime ancjemò che une liste di events. Dai 22 ai 25 di Otubar, i apontaments musicai a saran une schirie: 27 in dut, cun cualchi non di notâsi: par esempli, il musicist e rapper inglês Alfa Mist (sabide ai 24 tal Teatri di Cormons) e la composidore Carolina Bubbico, za diretore d orchestre a Sanremo (il stes dì a Gardiscje) cuntun gnûf progjet. E une schirie di mestris e talents de musiche di improvisazion: Craig Taborn e Peter Evans, Goran Kajfeš cu la Subtropic Arkestra, Julie Campiche, Pasquale Mirra, Shake Stew… Joibe ai 22 si tache ae 11 di buinore te Cantine Jermann cul tercet di Esmeralda Sella, tal dopomisdì Gal Golob Trio, Laura Jurd e sot sere Isaiah Collier cul so omaç pai cent agns di John Coltrane. (A.I.) – 21.10.2026
Foto di Ausar Ra
