Se nol è un miracul al mancje pôc. A Pordenon un pari al à salvât il so frutin che al stave colant jù de terace doprant il so cuarp tant che un scût. Cuant che al à viodût il so piçul di cuatri agns cori bande de terace che e jere cence pareman e butâsi tal vueit nol à pensât parsore dôs voltis: daspò ve capît che nol varès rivât a blocâlu, si è butat daûr dal frut, lu à cjapât e lu à strent in maniere che al rivàs a tiere dopo un svolt di cetancj metris protet propit dal so cuarp. Il svol al è finît parsore dal tet di une utilitarie vecje parcade tal curtîl. Al è stât propit il lamarin de auto a morestâ la violence de colade e a evitâ une tragjedie.
Puartats daurman tal ospedâl di Pordenon, il pari e il so frutin a son jessûts za la dî dopo cence consecuencis, parcè che nissun dai doi al à patît feridis griviis.
A contà il fat al è stât il primari di pediatrie dal ospedâl pordenonês, Roberto Dall’Amico: “Al è stât pardabon un miracul. Il par nol à vût pôre di riscjâ la sô vite pal fi, forsit parcè che la pôre di pierdi un frutin e je une vore plui fuarte di chê di salvâsi. Cheste storie e je lade a finî ben, ma nus vise di trop che i piçui a vedin bisugne di une atenzion costant e dal fat che a voltis un pocje di fortune e jude”. (a.d.g.) – 20.10.2026
