La Vuardie di finance di Pordenon e à documentât passe 500 venditis di droghe fatis cul jutori de morose minôr di etât. Par chest un afghan al è stât metût ai arescj domiciliârs cul braçalet eletronic.
La investigazion e jere tacade daspò che i agjents a vevin viodût l’om vendi droghe dilunc di un control. I aciertaments e la percuisizion fate pôc dopo a vevin permetût di scuvierzi e secuestrâ 6,1 grams di cocaine e 4.210 euros vuadagnâts cul spaç. L’om tal principi al jere stât dome denunziât.
Lis investigazions a son ladis indenant e controlat il telefon e tirant su lis testemoneancis dai clients al jere saltat fûr che l’afghan al veve vendût 575 dosis di droghe, dade ancje a un minôr di etat e cjapant dentri inte ativitât di spaç ancje la morose. (a.d.g.) – 19.10.2026
