Taramot: un documentari ator pal Friûl

L’ERT, Ent regjonâl teatrâl dal F-Vj al presente il documentari “1976 – 2026. La forza dei legami”, la fuarce dai leams in sîs lûcs dal so circuit. Prodot di ERT di une idee dal regjist Alberto Bevilacqua, il lavôr al è curât di Paolo Patui, che al il regjist adun cun Paola Zoratti. Il documentari al sarà presentât martars ai 20 tal Cine “David” di Tumieç, vinars ai 23 tal Auditorium “Alla Fratta” di S. Denêl, sabide ai 24 tal “Verdi” di Mugle, domenie ai 25 al Auditorium comunâl di Çopule, vinars ai 30 tal Teatri “Italia” di Pontebe e ai 12 di Novembar tal Centri “Livio Poldini” di S. Quarin. Prime des proiezions, che a son dutis a jentrade libare cence sore nuie, a sarà une curte presentazion di Paolo Patui e Alberto Bevilacqua. Prodot in ocasion dal cincuantesim aniversari dal taramot in Friûl, il documentari no si concentre dome sui events di chei dîs. Intun Friûl petât in maniere profonde, ancje la culture e i spetacui dal vîf a àn contribuît a creâ gnovis oportunitâts par incuintris, si che duncje il cine al vûl esplorâ cemût che il taramot al à vût un impat sul disvilup de culture in regjon, e in massime sul teatri e sui spetacui dal vîf. A ricostruî chest viaç a son lis vôs di chei che, di prospetivis diviersis, a àn vivût la vite culturâl e teatrâl de regjon intai ultins cincuante agns: atôrs e atoris, regjiscj, organizadôrs e tecnics, dongje dai intervents dal scritôr Angelo Floramo. La colone sonore, scrite dal puar U.T. Gandhi e di Mauro Costantini, a compagne la narazion. (A.I.) – 19.10.2026