Jazz pai muarts di Breçan a Cormons

Trê anteprimis dai 17 ai 19 a Cormons pal festival “Jazz & Wine of Peace”, dedicât ae musiche di improvisazion, un dai prins a sielzi artiscj no dome de ‘tradizion’ e a puartâ la musiche tai teatris, ma ancje in cantinis e vilis storichis. Il prin apontament, te cantine Polje di Cormons, al è il spetacul “Studio per un incontro”, te suaze dal Visavì Gorizia Dance Festival. Il secont al è un conciert de corâl Audite Juvenes, in omaç a Guerrina Skocaj e Quirin Kuhnert, muarts l’an passât par colpe de lavine a Breçan. Ai 20, invezit, trasfierte a Gurize cu la Zerorchestra. Il program plui penç al tache di joibe ai 22, ma prime Controtempo e scree la rassegne jazz a Sacîl, la che aromai di 22 agns si davuelç la rassegne “Il volo del jazz”, tal teatri e te Fazioli Concert Hall. Sîs i concierts di chest an, plui altris doi tal 2027 par tacâ a fâ fieste par Pordenon capitâl de culture. Si scomence cui pianist american Jason Moran, une des stelis contemporanis de musiche di improvisazion, ai 18 di Otubar, po dopo a rivaran Nate Smith, l’omaç pai cent agns di Miles Davis e Coltrane dal pianist Emmet Cohen, Michael Mayo, Sergio Cammariere, Omar Sosa, cualchi propueste inovative, lis “contis jazz” e une mostre. (A.I.) – 16.10.2026