Ridusi i consums di energjie e je une des sfidis plui impuartantis dai nestris timps e no dome par vie dal fat che la energjie e coste, ma soredut parcè che o stin fasint i conts cui cambiaments climatics. Dal sigûr, une part pardabon impuartante le puedin vê i nestris Comuns, che une vore dispès a àn ancje di fâ i conts cun belançs tirâts. Ve chi parcè che une iniziative come chê de Agjenzie pe Energjie dal F-Vj, che e inmanee di une vore di agns un concors dedicât propit al fat di sparagnâ e doprâ miôr la energjie, e devente ancjemò plui impuartante. “Energy Awards 2026”, ven a stâi i premis pe energjie di chest an a son dedicâts a chei municipis che si son impegnâts te adozion dai compuartaments juscj par ridusi i consums dant cussì une man ae bataie cuintri dai cambiaments climatics.
“Chel di no strassâ energjie al è stât fin dal principi – al sotlinee Loreto Mestroni, president di Ape Fvg – il prin obietîf di cuant che e à viert tal 2006 la agjenzie. Par chest si sin concentrâts sul fat di doprâ in maniere inteligjente la energjie e o vin tacât a lavorâ su la certificazion dai edificis doprant il protocol Casa Clima che in chê volte al jere il model di riferiment. Vuê o sin impegnâts suntune vore di progjets, ancje di nivel european, ma al reste fondamentâl il lavôr a pro dal teritori, soredut dai Comuns, come tal câs dal catastic energjetic, par fâ in maniere che ogni municipi al rivi a savê indulà che al consume plui energjie e indulà intervignî. Il jutori aes aministrazions comunâls al è un dai compits dâts ae nestre agjenzie, ancje parcè che une vore dispès lis competencis tai uficis comunâi su chest argoment a son limitadis, competencis che invezit a àn i nestris tecnics. Cun di plui o stin ancje lavorant sul teme dal agrivoltaic, indulà che e covente une vore di clarece par fâ in maniere che un parc fotovoltaic nol deventi une oficine eletriche butade suntun teren, ma che invezit al rispieti e al permeti lis ativitâts agriculis”.
Par partecipâ al concors, rivât ae seste edizion (inte ultime a son stâts premiâts 17 municipis) e che al è a gratis, i Comuns a àn timp fintremai ai 15 di Setembar: si trate nome di compilâ i documents che si puedin scjamâ dal sît de agjenzie e rispuindi aes domandis che a rivuardin chescj argoments: gjestion e planificazion; contabilitât energjetiche; azions par ridusi i consums; produzion di energjie rinovabile; mobilitât sostignibile e, par ultin, comunicazion ai citadins.
Nol reste che spietâ par viodi chest an cui che al meretarà chest impuartant premi. (a.d.g.) – 03.09.2026
