Cuatri dîs plens di apontaments in mont par “Risonanze”

La rassegne di musiche e di costruzion di struments musicâi “Risonanze” e jentre tal vîf a Malborghet Valbrune e tai boscs de ‘Saisare, cuntun calendari plen di apontaments par dut il fin de setemane, di joibe ai 19 e fint a domenie a 22. Concierts, ativitâts al viert, incuintris, cercis cu la musiche e la fiere dal “Len vîf” tes stradis di Malborghet a son dome che une part dal program de decime edizion, che e dâ acet a ecelencis regjonâls e dal forest, di dut il mont. Joibe ai 19 si tache cuntune cunvigne sui struments, po dopo a tachin i concierts: la Red Dot Baroque di Singapûr direte di Alan Choo cul sopran Teng Xiang Ting, il pianist Mattias Antonio Glavinic, la musiche “mariachi” dal Messico dai La Bamba, la orchestre dai zovins Filarmonici Friulani cun Giulia Coschiera al sitar e la vôs de alpiniste Nives Meroi, e po dopo ancjemò cetant altri: tango, tradizion americane, flamenco… (A.I.) – 18.06.2025