Gnûfs progjets par un valôr di un miliart e 40 milions di euros a saran candidâts de Regjon Friûl-Vignesie Julie pai finanziaments dai fonts struturâi europeans e dal Plan Nazionâl di Riprese e Resilience.
A rivuardin setôrs che a van dal pericul idrogjeologjic ae mitude in sigurece des infrastruturis viariis, des scuelis, dai asîi e des palestris, fin al compart de salût e dal eficientament energjetic.
“Si trate – e à dit l’assessôr regjonâl aes Financis, Barbara Zilli, intal cors dal novesim incuintri de cabine di regjie dal Pnrr – di progjetualitâts che la Regjon e calcole strategjichis”.
Dilunc de riunion e je saltade fûr la dibisugne de bande di cualchi Aministrazion comunâl di sprolungjâ lis strentis tempistichis previodudis intai cronoprograms, in particolâr sui intervents di mitude in sigurece di asîi e scuelis. “Il nestri impegn – e à dit Zilli – al è di otignî la proroghe: o volìn che lis risorsis mitudis a disposizion a puedin jessi compatibilis cu la lôr metude a tiere garantint i invistiments a pro dal teritori”.
Fra lis prioritâts a jentrin la riduzion dal pericul idrogjeologjic cu la realizazion di intervents complementârs ae agadorie dal Cormôr, la mitude in sigurece des arzinadure dal torint Tor e dal flum Lusinç (241 milions); invistiments in infrastruturis idrichis primariis pe sigurece de provision idriche (20 milions) a pro de Autoritât uniche pai servizis idrics e i refudons; la realizazion di implants di irigazion, micro bacins e piçui lâts artificiâi pe razionalizazion des risorsis idrichis e la valorizazion des culturis di presi (269 milions).
Par ce che al tocje la sanitât, a son previodûts cent milions par finanziaments zontâts di destinâ aes cjasis de comunitât e ospedâi di comunitât e iniziativis leadis al Repower Eu, la linie di finanziament metude a disposizion de Union europeane intal cuadri dal Pnrr, cun contribûts aes impresis pal eficientament energjetic (50 milions).
Altris progjetualitâts a rivuardin la mobilitât ciclistiche (16,369 milions), intervents di mitude in sigurece di scuelis, asîi e palestris (10 milions), e intervents struturâi su la linie feroviarie Udin-Cividât (19 milions). (A.D.G.) – 9.06.2023