Stai: une comunitât intun puest rimit

Par rivâ fin là, bisugne cjaminâ sul troi dal CAI 417: la uniche strade pai Stai, piçul borc in comun di Mueç che dal an passât al è stât mudât intun laboratori tal viert, là che art, artesanât e comunitât si cjatin. “Intrecci”, tramis, e je une part dal progjet metût dongje di Uponadream te suaze di un percors di rigjenerazion culturâl clamât “Isola di Stavoli” e e previôt doi dîs dentri de nature tal lûc plui isolât dal Friûl par sperimentâ art e creazion ducj adun, grancj, piçui e fameis. Ancje il public, che nol è dome spetatôr, ma part ative di un procès che al rive fint ae cure dal teritori. Sabide ai 2 e domenie ai 3 di Mai, artiscj, artesans, volontaris e partecipants a saran tirâts dentri di une schirie di laboratoris e intervents di art, pensâts e fats a pueste pal lûc, par cure di Michele Pizalli, Aeson,Jacopo Sandrin, ReAlps e altris. Lavorant ducj adun, a saran fatis oparis coletivis di doprâ, che a restaran tant che ereditât dal progjet. Il fin al è propit chel di intivâ relazions – fâ, scoltâ e passâ il timp cui altris – in spazis diferents di incuintri, gjenerant competencis e lassant olmis tal lûcs traviersâts. Il program des dôs zornadis al previôt ancje cualchi spetacul su la memorie, il cambiament e la relazion cul ambient, par cure di Marta Riservato, Francesco Ciprian, Alvise Nodale, Davide Raciti e altris. (A.I.) – 30.04.2026