Libris vendûts a pês a Pordenon

E vevin di deventâ cjarte strace, ma a son stâts “salvâts” e cumò si podaran comprâ “a pês”, compagn di pomis e verduris! La iniziative “Librokilo” e rive ancje in regjon, domenie ai 22 di Març a Pordenon, cuntune selezion grandonone di libris che e vevin di jessi disfats. Par dut il dì, invezit, li dal Capitol (un spazi culturâl gjavât fûr di une sale cinematografiche che no je plui) al sarà pussibil comprâju cuntun presit che nol è che di cuviertine, ma propit “a chilo”. La AIE, associazion taliane dai editôrs, e calcole che dome l’an passât in Italie a son jessudis 85 mil novitâts: cuasi dîs libris par ogni ore! La plui part e devente cjarte strace in pôcs mês: une straçarie di cjarte e di coscj pal traspuart che i organizadôrs dal event, la agjenzie Materia Talk, a cirin di ridusi. Ancje in cheste edizion, ognidun al pues puartâ i siei libris, se a son ben tignûts (informazions, criteriis pe selezion dai libris e dut ce che al covente su www.librokilo.it), e judâ in maniere ative al ricicli, miôr se doprant une sporte che no sedi di plastiche! (A.I.) – 20.03.2026