La fieste su la Tor par salvâ la aghe

Vê la bielece e puarte une gruesse responsabilitât: chê di tignîle di cont. La nature e je forsit la plui grande bielece rivade a nô cence sore nuie e simpri plui a risi, massime la aghe. Di cualchi an al è nassût un festival, inmaneât de associazion “I Vuardians de Tor”, nassude di une idee dal president Emanuele Portelli par promovi la nassite di un “contrat di flum” bon di tirâ dentri dutis lis comunitâts dongje de aghe. Daspò di chel, e je rivade dal 2023 la rassegne “Art in Tor – Festival des Comunitâts de Tor”, che chest an si fâs a Seorgnan di joibe ai 27 e fint a domenie ai 30 di Avost. Un apontament metût adun di int cuntun fuart leam cul teritori e la comunitât, fat par altre int cul stes amôr pe nature e l’ambient, tal “Parc Te Tor” di Seorgnan e chel di Çumpite li dongje, in colaborazion cu la Pro Loco dal paîs, il grup dai alpins, la associazion Grigioneri e i volontaris. Par cuatri dîs, dentri e ator dal parc, dongje dal flum, a son programadis ativitâts par fruts, escursions vuidadis, laboratoris, yoga, zûcs e sport, un marcjât di artesans, concierts (Chiara Spizzo, Uttern, Michele Pucci… ) e cetant altri. E la novitât dal an “Bike in Tor”: une escursion ecologjiche e panoramiche in biciclete dilunc di un percors di 15 km par valorizâ il paisaç dongje de Tor. (A.I.) – 26.08.2026