Gurize, ancjemò une “crosere de Europe”

Di Mai e fint a Dicembar dal 2026 al torne sul teritori “Crocevie d’Europa”, croseris de Europe, il progjet di promozion dal turisim e de culture ideât dal comun di Gurize. Rivât ae sô cuarte edizion, si conferme une des iniziativis plui ricognossibilis tal cjamp dal disvilup teritoriâl. Daspò de edizion speciâl leade al an de capitâl europeane de culture, il progjet al torne cuntun program di uns cuarante events: progjets culturâi, visitis vuidadis e aes aziendis, creant une narazion largje e complesse di Gurize e dal teritori transfrontalîr. Il progjet turistic e culturâl, presentât dal sindic di Gurize, Rodolfo Ziberna, al è un viaç di scuvierte che al instrece memorie, paisaç, identitât e contemporaneitât, compagnant i abitants e i visitadôrs dilunc dai itineraris a pît, in biciclete e traviers di esperiencis imersivis. Il prin event al è previodût par domenie ai 3 di Mai cun “Gurize citât ebraiche”, un itinerari che al passe traviers di lûcs emblematics. Lis altris novitâts a son il “bagn tal bosc” tal Parc Piuma, il percors transfrontalîr dal Pas dal Rafut, il convent di Castagnevizza, lis visitis al museu des siencis naturâls di “Alvise Comel” e cussì indenant. (A.I.) – 28.04.2026