Borc Langobart a Romans: ultime viertidure

La associazion “Invicti Lupi” e comuniche une viertidure speciâl dal “Borc Langobart Invicta Luporum” sabide ai 27 di Jugn. In prevision dai lavôrs di disvilup des struturis storichis, che a saran puartâts indenant vie pal Istât tal parc storic culturâl di Romans dal Lusinç dentri de ex polvariere militâr, par permeti la gnove scree vie pe Sierade, prime di sierâ dute la zone al public, la associazion e inmanee une zornade dedicade ae storie vivent, tirant dentri pe ultime volte il public. Vie pal dì, i visitadôrs a podaran viodi i cjamps storics, dulà che i rievocadôrs a ufriran spiegazions e aprofondiments ator de Ete di Mieç inte nestre regjon. Un grant spazi al sarà dedicât ai seminaris di artesanât e sport dulà che grancj e piçui a podaran provâ di prime man lis ativitâts di storie vivent. La rievocazion storiche “Une zornade dal Istât tal borc langobart” e sarà a jentrade libare cence sore nuie. (A.I.) – 26.06.2026