Un cine prime de fieste pai cent agns di Basaglia

Ae vilie dal centenari de nassite di Franco Basaglia, al rive in Friûl-Vignesie Julie “Kripton” di Francesco Munzi, un documentari che al indaghe la vite sospindude di sîs fantats dai vincj ai trente agns, ricoverâts in maniere volontarie in dôs comunitâts psichiatrichis de perifarie romane. Dopo Triest, il cine al rive – cul stes regjist ospit speciâl des proiezions – miercus ai 7 tal Visionario di Udin e joibe a Cinemazero di Pordenon, inte suaze dal program di anteprimis dal “Pordenone Docs Fest”. Il cine al invie ancje il progjet “Franco Basaglia ha 100 anni” (Franco Basaglia al à 100 agns), che al previôt une retrospetive itinerante intai cines de regjon e po dopo in Italie. (A.I.) – 06.02.2024