Un 6 di Mai di memoreâ in musiche

Musiche, sacre e non, teatri, un cine, poesiis, ricuarts e une stele de musiche mondiâl. L’aniversari dai 6 di Mai si memoree ancje cui concierts e cualchi progjet nassût a pueste par mudâ il dûl intune memorie par ducj, ancje par chei che tal ’76 no jerin nassûts o ben no jerin achì. Propit la sere dai 6 di Mai, tal Teatri gnûf “Giovanni da Udine” e sarà presentade pe prime volte “55 secondi”, un titul sielt daûr des peraulis di une poesie di pre David Maria Turoldo pe gnove opare jenfri liriche e musichis contemporaniis, che e je stade ideade, scrite e curade di Fiorenza Cedolins cu la produzion de FVG Orchestra. Dodis i soliscj sul palc – ducj zovins, cun cualchi vôs preseade de regjon – e adun cui 40 musiciscj de sinfoniche regjonâl a saran un centenâr in dut: la corâl dal F-Vj, i Pueri Cantores dal Domo di Udin direts di Annamaria Dell’Oste e i danzadôrs di Axis Danza. Il dì dopo,joibe ai 7 te caserme Goi-Pantanali di Glemone, il grant conciert par 15 mil personis dal tenôr Andrea Bocelli, simbul de cjançon taliane tal Mont. Anzit, plui stant che tes ultimis oris a son saltats fûr altris 2 mil puescj di prenotâ in rêt su www.ticketone.it. (A.I.) – 05.05.2026