Te vile de pôre cun Anà-Thema

Al torne ancje chest an un dai apontaments plui preseâts dal calendari di Anà-Thema Teatro, la grande fieste di Halloween, che di passe dîs agns e mude cualchi lûc storic o cjasis antighis dal Friûl intun senari di pôre. Daspò dal sucès des passadis edizions, che a àn tirât dongje miârs di spetatôrs cheste edizion e promet di bati ogni record cun “Il circo infernale”, Il circ dal infier. Il gnûf spetacul itinerant di Luca Ferri al larâ in sene al prin e ai 2 di Novembar cun trê replichis par dì (aes 4 e 6 e mieze di dopomisdì e aes 9 sot sere) a Vilefrede di Tarcint. Il public, in piçui grups, al sarà menât dilunc di un percors teatrâl tes salis e tai zardins de vile, là che si cjatarà devant cualchi personaç plui di vencul che di insium. (A.I.) – 30.10.2025