Pasolini, il conciert “dissegnât”

A son aromai cuasi 25 agns che i Tre Allegri Ragazzi Morti di Pordenon, il simbul de sene “indipendente” cressude tal Paîs, il grup plui stramp e mancul “tradizionâl” de musiche taliane, cul so miscliç di punk, art e poesie, a puartin ator un spetacul unic: “Pasolini, concerto disegnato”. Un conciert fat dal grup in direte tant che i dissens dal cjantant e innomenât fumetist Davide Toffolo, par contâ intune maniere diferente la biografie dal poete di Cjasarse, un dai inteletuâi plui impuartants dal Nûfcent talian, une figure ancjemò vivarose e che e fâs simpri discuti. Pai cent agns de nassite di Pasolini, il spetacul al jere stât presentât a Cjasarse, e cheste volte lis replichis a saran trê: sabide ai 22 e domenie ai 23 tal auditorium “Zotti” di S. Vît dal Tiliment e ai 29 di Novembar tal teatri “Miela” di Triest. Il spetacul al è nassût propit puartant sul palc, in forme di conciert dissegnât “dal vîf”, il fumet: la ispirazion principâl, adun cu la musiche dal grup, sunade sul palc intant che Toffolo al dopre i pinei mudant la sô opare stampade intune esperience di viodi e di scoltâ, dant colôr e forme aes visions di Pasolini, al so cuarp, ae sô vôs, ai siei pinsîrs che par cualchidun a son ancjemò un scandul. (A.I.) – 20.11.2025