“Palchi nei parchi” al puarte musiche e teatri in lûcs naturâi

Par trê mês e ufrirà spetacui cence sore nuie tal viert, anzit, te nature, in passe vincj lûcs naturâi di dutis e cuatri lis provinciis de regjon. La seste edizion de rassegne di musiche e teatri ator pe regjon “Palchi nei parchi” (Palcs tai parcs), nassude di une idee dal Servizi forestâl de Regjon F-Vj, cu la direzion artistiche de Fondazion “Bon” di Culugne, si vierç al prin di Jugn tal parc di vile Chiozza a Scodovacje cun l’atôr Paolo Hendel che al presente il so gnûf spetacul “Tempi moderni”.
Cressude in pôcs agns, cu lis peraulis dal assessôr ae culture Mario Anzil, “e je deventade un esempli di integrazion dal spetacul cul ambient, in graciis di cu che al fâs i palcs cul len dai nestris boscs, dal estri di cui che al bute jù il program e di un public ferbint che al sielç di vivi un spetacul in senaris inmagants, cuntune cuvierte in spale”. Parcs, boscs, mulins, vilis, cjistiei, citâts storichis e cualchi event ancje di là dal confin a saran la curnîs di une rassegne che e à za vût une anteprime, cul grup austriac Pallawatsch a Malborghet.
Po dopo, fint ai 7 di Setembar, a son previodûts il grup “Musica da ripostiglio” cul spetacul Italian Bazar, l’omaç a Mercedes Sosa cul Barrio Trio, il mestri dal folk britanic Allan Taylor cul nestri Lino Straulino, i irlandês Birkin Tree, la Fvg Orchestra, il sestet sloven Katalena il ghitarist Giovanni Baglioni, plui cualchi spetacul ancje in anteprime, di “Sacred peaks”, cu la vôs di Luisa Cottifogli a La montagna che vorrei” a “Oltre il petrolio” il Patrizio Roversi. (A.I.) – 30.05.2025