30-05-22. Al è tacât il cont par ledrôs pe gnove edizion di Suns Europe, Festival des arts in lenghe minorizade e soredut la rassegne musicâl organizade ogni an de cooperative Informazione Friulana, editore di Radio Onde Furlane. Il bant al è indreçât ai grups musicâi e ai autôrs che la lôr produzion artistiche e je intune lenghe minorizade di Europe.
Ancje chest an, l’intindiment dal festival al è chel di valorizâ lis miôr produzions contemporaniis intes lenghis minorizadis, si che duncje ancje la selezion musicâl e darà visibilitât aes propuestis che a vignaran consideradis plui origjinâls e inovativis. Pe edizion 2022, la rassegne si davuelzarà in doi diviers moments.
In Istât, dai 30 di Jugn ai 15 di Lui, al è in program un calendari siôr di apontaments a Dartigne, Murùs, Puçui, Lavarian, Romans dal Lusinç, Cormons, Vilalte e Udin. L’event finâl, invezit, si fasarà ae fin de Sierade, in Novembar. I finaliscj selezionâts a vignaran invidâts inte capitâl furlane par sunâ dal vîf vie pe zornade finâl dal festival, in program pai 26 di Novembar dal 2022. A.I.
