Il confin jenfri Italie e Slovenie si sfante par cualchi setemane cu la decime cuinte edizion di “Glasbe sveta | Musichis dal Mont”, inmaneât dal circul Controtempo di Cormons e dôs associazions slovenis, KUD Morgan e il Goriški Muzej. Un incuintri di sunadôrs di chenti, talians e internazionâls e di gjenars diferents – dal jazz ae musiche eletroniche – che al tache dal sproc dal an, “acordadôrs di pâs”. Ducj i ospits a cirin un confront inaltrò, dut chel che al è discognossût e estrani, e si metin in discussion cun notis che a rivin di teritoris là che no son confins, ma empatie, sazis spartîts e rispiet pal “altri”. I concierts di cheste bande dal confin, a Gurize, si fasaran pe prime volte tal “Piccolo Cielo” dal parc Basaglia: si tache martars ai 22 cu la cjantante furlane Elisa Martin e il so conciert dome par vôs (e pôc altri) “Vox Humana”, intant che ai 28 a rivin di Turin (ma la ispirazion e ven de Afriche) Afrodream e ai 30 la cubie pardabon cence confins, de Irlande ai Balcans, de cubie Boštjan Gombač-Igor Leonardi. In Avost il festival si fasarà tal cjistiel di Kromberk a Gnove Gurize, la che i ospits plui innomenâts a son Hamid Drake, Pasquale Mirra e il cuban Omar Sosa cul so grup. (A.I.) – 27.07.2026
Musichis dal mont: jazz sul confin a Gurize
102