Lis lotis de “joibe grasse” ai Colonos

Martars ai 19 di Avost li dai Colonos di Vilecjaze di Listize aes 8.30 sot sere (se al plûf, tal Teatri Plinio Clabassi di Sedean), al va in sene “Strumîrs e zambarlans” di Alviero Negro, adatament dramaturgjic e regjie di Ferruccio Merisi, musichis di Marco Maiero. La produzion dal Teatri Stabil Furlan e tache de opare di un dai plui interessants scritôrs in lenghe furlane e conte la rivolte popolâr e tragjiche dal Rinassiment talian, che e je jentrade ta la storie come la “crudel zobia grassa”: lis violencis e il riviel dal 1511 che tacant de citât di Udin si son slargjadis par dut il Friûl, cun maçalizis e sacs in dam de nobiltât locâl, za dividude in dôs fazions in lote: une cui venezians, une cui Asburcs. Il drame, che al met cuintri i nobii e i contadins, al ven proponût ai Colonos intune gnove preparazion fate di pueste, tal spazi senic naturâl dal curtîl rurâl. (A.I.) – 18.08.2025