La storie dal Friûl su Prime Video

No si ferme la corse di “Marcho. La ultime bandiere”, il cine di Marco Fabbro che al conte un toc di storie furlane. Dopo dal sucès de prime assolude su Rai Storia, il dopli ricognossiment intai USA (il “Best Historical Film” e l’“Award of Excellence Special Mention”), e dopo jessi deventât ancje un satûl in version DVD, Blu Ray e Ultra HD Blu Ray, cumò al rive ancje su Prime Video: la plateforme streaming video on demand di proprietât Amazon e je la plui doprade in Italie, cui siei passe 11 milions di iscrits e il 26% di cuotis. Cun di plui, in curt al sarà a disposizion su Apple tv e su Google Play (inte sezion Film midiant de plateforme YouTube). “Al è pardabon impuartant – al à dit il president de ARLeF, Eros Cisilino – che “Marcho. La ultime bandiere” al sedi su Prime Video. La nestre identitât e la nestre lenghe a rivin di fat suntune plateforme doprade a nivel globâl, e duncje ancje dai furlans tal forest, di là che dai furlans di chenti. Ducj a podaran gjoldi di un prodot ecezionâl, dentri di un imprest che pe prime volte al da acet a une produzion in lenghe furlane”. “Marcho. La ultime bandiere” al è disponibil in streaming in Italie e intai paîs di lenghe inglese. Il docufilm coprodusût de ARLeF e di Arte Video, cul contribût de Friuli Venezia Giulia Film Commission e dal Fonts pal audiovisîf dal Friûl-Vignesie Julie, al conte un fat restât platât par 500 agns. La storie e je chê di Marc di Murùs, l’ultin Puartebandiere dal Stât patriarcjâl di Aquilee, l’unic nobil che si è oponût ae invasion di Vignesie, tor dal 1420. (A.I.) – 02.02.2026