La musiche e torne tes vilis dal Friûl di Mieç

Cheste volte nol è impuartant dome il lûc, ma ancje il spirt dal event, stant che il teme de vincjesime seste edizion di “Musica in Villa”, la rassegne inmaneade dal PIC, il Progjet integrât culture dal Friûl di Mieç, e à sielt une peraule che e ten dongje ducj i apontaments e che e je presinte tal puest ospitant o tai protagoniscj o tal repertori dal conciert: “inclusion”. La responsabil dal progjet Gabriella Cecotti e à selezionât pai 16 concierts – doprant ancje criteriis di acessibilitât par ducj – ancjetancj lûcs che no son dome lis vilis dal teritori, ma ancje glesiis e gleseutis e i lôr spazis, e propit dal sagrât de parochie di Flambri si tache joibe ai 9 cuntun conciert che al celebre il Nûfcent doprant la sensibilitât dei compositôrs di chenti instreçade cu la opare di un grant artist de nestre tiere, Afro Basaldella, par un Dialic jenfri sunôr e dissen proponût de academie Naonis direte di Valter Sivilotti cun ospite Luisa Sello. Intun pâr di câs, i grups in program a son nassûts propit tant che progjets di inclusion vere: la orchestre AMI-Ritmea di Udin e il “Super Coro” metût dongje cui ospits di centris residenziâls (La Pannocchia, il Mosaico, CSRE). La novitât plui grande e je che ducj i musiciscj di chest an a son de regjon: de cubie Cossi-Comisso ae coral Foraboschi, dal pianist Matteo Andri ae arpiste Emanuela Battigelli. (A.I.) – 08.07.2026