Un apontament fat di grandis emozions e di grancj numars tal Teatri gnûf “Giovanni da Udine” domenie ai 3 di sere. Pe esecuzion di une des oparis mestris plui impuartantis de musiche sacre, la monumentâl Messe da Requiem di Giuseppe Verdi, a laran sul palc passe 150 elements: professôrs de orchestre, vôs de corâl e soliscj. La grandone formazion liriche sinfoniche e sarà direte pe ocasion di Roberto Abbado, un simbul de tradizion musical taliane tal mont. Une vore impuartant ancje il cuartet dai soliscj che al met adun vôs talianis di nivel une vore alt: il sopran Roberta Mantegna, il mieç sopran Annalisa Stroppa, il tenôr Antonio Poli e il bas Alessio Cacciamani, cu la Corâl dal Friûl-Vignesie Julie, la FVG Orchestra e la partecipazion di artiscj de Corâl dal Teatri liric “Giuseppe Verdi” di Triest. (A.I.) – 02.03.2023
Foto di Y. Kageyama
