Jazz & Wine of Peace: Cormons e il Cuei a deventin un grant palc

Gnove edizion, la numar 28, par Jazz & Wine of Peace”, il festival internazionâl che dai 23 ai 26 di Otubar al mude Cormons e il Cuei jenfri Friûl e Slovenie intun grant palc di musiche e culture. Ideât e inmaneât dal circul Controtempo, al instrece come simpri il jazz contemporani e lis ecelencis enogastronomichis dal teritori, riclamant public de Italie e de Europe. In cuatri dîs a son in program 29 events in 4 teatris (Cormons, Gurize, Gnove Gurize, Gardiscje) e 21 cantinis, in dimoris storichis e altri lûcs dal teritori. Il prin cartelon firmât dal gnûf diretôr artistic Enrico Bettinello al previôt un “Premi Bardusco” in memorie dal storic fondadôr de rassegne, muart l’an passât, che al larà a William Parker, in conciert propit joibe ai 23 cul so tercet a Lucinîs te vile Attems. I nons plui impuartants a son cheo di James Brandon Lewis (joibe ai 23, ma a Cormons), la saxofoniste inglese Nubya Garcia (stes lûc, il dì dopo), The Necks (vinars ai 24 a Gardiscje), i talians Calibro 35 (sabide ai 25), e une schirie di feminis. (A.I.) – 22.10.2025